அவுஸ்திரேலிய ஏற்றுமதி நிறுவனத்திற்கு செலுத்தப்பட்ட 2.5 மில்லியன் டொலர் அரச கடன், மூன்றாம் தரப்பினரால் மோசடி செய்யப்பட்டுள்ளமை பாராளுமன்றத்தில் உறுதிப்படுத்தப்பட்டுள்ளது. நிதி, திட்டமிடல் மற்றும் பொருளாதார அபிவிருத்தி பிரதி அமைச்சர் அனில் பெர்னாண்டோ செவ்வாய்க்கிழமை (5) இதனைத் தெரிவித்தார். வெளிநாட்டு வளங்கள் திணைக்கள அதிகாரிக்கு வந்த சந்தேகத்திற்குரிய மின்னஞ்சல் மூலம் இந்த மோசடி வெளிச்சத்திற்கு வந்தது. இதனைத் தொடர்ந்து, இந்தியாவின் எக்சிம் வங்கியுடனான கொடுக்கல் வாங்கல்கள் இடைநிறுத்தப்பட்டன. இந்த விவகாரம் குறித்து விசாரிக்க விசேட குழு நியமிக்கப்பட்டு, நான்கு அதிகாரிகள் பணிநீக்கம் செய்யப்பட்டுள்ளனர். அவுஸ்திரேலிய உயர்ஸ்தானிகராலயமும் இந்த மோசடியை உறுதிப்படுத்தியுள்ளது. அரசாங்கம் எதனையும் மறைக்கவில்லை என்றும், சைபர் குற்றவாளிகளைக் கண்டறிய சர்வதேச மற்றும் தேசிய மட்டத்திலான விசாரணைகள் முன்னெடுக்கப்படுவதாகவும் அமைச்சர் குறிப்பிட்டார். எதிர்க்கட்சிகளின் குற்றச்சாட்டுகளை நிராகரித்த அவர், விசாரணைகளின் முடிவிலேயே இறுதித் தீர்மானம் எடுக்கப்படும் எனத் தெரிவித்தார்.