Комитетот за односи меѓу заедниците изгласа предлог-законот за соодветна и правична застапеност да се усвои со „мал Бадентер“, што значи со мнозинство гласови од присутните пратеници и мнозинство од немнозинските заедници. Овој исход беше поддржан со 11 гласа „за“ и два „против“, отфрлајќи го предлогот на пратениците од Европскиот фронт и Албанската лига за „голем Бадентер“. Опозициските албански партии и пратеници од турската заедница изразија критики, укажувајќи дека законот не предвидува квоти ниту механизми за контрола на правичната застапеност, што го сметаат за столб на Охридскиот рамковен договор и Уставот. Основната цел на законот е да обезбеди правна рамка за правична застапеност на сите заедници во органите на државната власт и јавните институции, со цел еднаков пристап до вработување и унапредување, како и фер и транспарентни постапки во јавниот сектор. Законот е во прво читање и предвидува јавна расправа.