Tiktoker İlduzə Hacıyevanın ("Arzum") törətdiyi və ölümcül nəticələnən avtomobil qəzasından sonra yayılan iddialar müzakirələrə səbəb olub. Hadisə zamanı həlak olan Amal Məlikovun qanında narkotik maddənin olduğu barədə məhkəmə sənədlərinin paylaşılması, qəzanın səbəblərini yenidən gündəmə gətirib. Bu məsələyə aydınlıq gətirmək məqsədilə Səhiyyə Nazirliyinin Məhkəmə-Tibbi Ekspertiza və Patoloji Anatomiya Birliyi tərəfindən müvafiq araşdırma aparılıb. Məhkəmə-tibbi ekspertiza rəyinə əsasən, qəza tarixində həlak olan Amal Məlikovun qanında nə spirt, nə də hər hansı bir narkotik vasitə aşkar edilməyib. Bu rəsmi sənəd, qəza zamanı məmurun maddə təsirində olduğu ilə bağlı yayılan şübhələri rəsmi olaraq təkzib edir və hadisənin şərtini aydınlaşdırır. Ekspert rəyi, qəza ilə bağlı yayılan narkotik ittihamlarının əsassız olduğunu sübut edən ən mötəbər sənəd hesab olunur.